كلنا نعرف أنه تربية طيور القنص تحتاج معرفة مسبقة ومهارة  ، مرة من المرات حبيت أعزم واحد من الربع على العشى في خيمتنا الخاصة ، طبعا الجلسة في الخيمة جلسة شبابية  ، نتعشى مع الشباب و نتقهوى وبعدها يكون المجال مفتوح للسوالف ، المهم أن المرة الي كان فيها صاحبنا قاعد معانا  في الخيمة كان الشباب يسولفون  عن الصقور وأنواعها ورحلاتهم في القنص ومفاجئاتها ، صاحبنا المسكين تحمس للموضوع وقرر أنه يربى طير  مع أنه  ما يعرف شي عن الطيور  طبعا الشباب شجعوه على الفكرة  ، بعد يومين أتصلبي الصاحب علشان يخبرني أنه اشترى طير وطلب مني اني أشوفه ، بصراحة  ما قدرت أمسك عمري من الضحك  لكنه كان مصر ، المهم سرت عنده علشان اشوف الطير  ويوم وصلت  شفت الصاحب حاط الطير في قفص  مثل قفص البغبغاء  ويحوطبه في البيت  أضنى كان يبغى يعلقه في الغرفة  ، صاحبنا كان يسئلني ( شو رايك في الطير ؟) وأنا كنت غرقان من الضحك  وبعد ما لملمت أنفاسي سرت معاه  وأشترينا شوية مستلزمات للطير مثل الوكر والسبق والمنقلة  وغيرها من الأشياء الضرورية للطير وما صدقت أخلص الى  لزم على الصاحب انى اسير معاه  وانجرب الطير  وبعد ما جربنا الطير وشافوه الشباب  ومدحوه  وبعد ما حصلتلي علثة علشان  أسير البيت ، صاحبنا شكله حب يكافئ الطير ويابله بطة كاملة  والطير طبعا كان ميت من اليوع  وتم يآكل يلين ما أختنق ، حاول صاحبنا أنه يسعفه بس ماشي فايده  الطير مات  ، أما صاحبنا تقبل الموقف بروح رياضية  ومثل ما قال انه لكل قنيص كبوة  والحين صاحبنا يفكر أنه يربى كلب صيد (سلق)  والله أعلم شو يكون مصير الكلب .